The Gottlieb Foundation Individual Support Grant — грант $25,000 для мастакоў з практыкай больш за 20 гадоў

Некаторыя міжнародныя гранты ствараюцца не для новых праектаў, выстаў або рэзідэнцый, а як форма прамой падтрымкі мастакоў, якія дзесяцігоддзямі працягваюць працаваць у мастацтве незалежна ад камерцыйнага поспеху і інстытуцыйнага прызнання. Менавіта да такіх праграм адносіцца грант The Adolph and Esther Gottlieb Foundation, арыентаваны на аўтараў з устойлівай мастацкай практыкай і працяглым прафесійным вопытам. Фонд штогод прысуджае 20 грантаў па $25,000 мастакам, якія працуюць у галіне жывапісу, скульптуры і графікі / printmaking, якія знаходзяцца на сталым этапе сваёй практыкі і адчуваюць фінансавыя цяжкасці. Падавацца могуць як мастакі з ЗША, так і міжнародныя аўтары — грамадзянства ЗША або від на жыхарства не патрабуюцца.

Хто можа падаць заяўку
Праграма разлічана на мастакоў, якія могуць пацвердзіць не менш за 20 гадоў сталай мастацкай практыкі. Пры гэтым фонд асобна падкрэслівае, што гаворка ідзе не пра ўзрост аўтара, а пра працяглае развіццё мастацкай мовы, тэхнічнага майстэрства і ўстойлівай уцягнутасці ў мастацтва. Адным з ключавых крытэрыяў становіцца візуальнае пацвярджэнне гэтай практыкі. Экспертная камісія ацэньвае не толькі асобныя працы, але і тое, як змянялася і развівалася творчасць мастака на працягу многіх гадоў.

Якія напрамкі падыходзяць
Падавацца могуць мастакі, якія працуюць з жывапісам, скульптурай і printmaking. Фонд не аддае перавагу пэўным стылям, тэхнікам або тэмам — абстракцыя, фігуратыў, канцэптуальнае мастацтва і традыцыйныя формы разглядаюцца на роўных умовах. Пры гэтым фатаграфія, відэа, кіно, digital art і міждысцыплінарныя практыкі разглядаюцца толькі ў тых выпадках, калі іх можна непасрэдна інтэрпрэтаваць як працяг жывапіснай, графічнай або скульптурнай практыкі. Таксама фонд не разглядае заяўкі ад дызайнераў, рамесных практык, адукацыйных праграм і арганізацый.

Якія матэрыялы патрэбны для падачы заяўкі
Заяўка патрабуе сур’ёзнай падрыхтоўкі і ўважлівай працы з архівам твораў. Мастаку неабходна прадаставіць два асобныя блокі выяў: 6 работ, створаных за апошнія 12 месяцаў, і 20–34 выявы работ за апошнія 20 гадоў. Выявы павінны быць размешчаны ў храналагічным парадку і паказваць развіццё мастацкай практыкі на працягу працяглага перыяду. Для грантавага цыкла 2026 года самыя раннія прадстаўленыя работы павінны былі быць створаны не пазней за 2006 год. Дадаткова неабходна ўказаць назву кожнай працы, дату стварэння, тэхніку і памеры. Фонд асобна папярэджвае, што composite-выявы, лічбава апрацаваныя выявы або выявы з некалькімі ракурсамі не прымаюцца да разгляду.

Фінансавыя дакументы і пераклады
Адным з галоўных крытэрыяў праграмы з’яўляецца фінансавая неабходнасць мастака. Акрамя мастацкага партфоліа, заяўнікі павінны прадаставіць фінансавую інфармацыю і падатковыя дакументы. Для міжнародных удзельнікаў гэта азначае неабходнасць падрыхтаваць поўны пастрокавы пераклад фінансавых дакументаў на англійскую мову. Калі мастак падае падатковыя дэкларацыі ў некалькіх краінах, фонд патрабуе прадаставіць усе адпаведныя дакументы. Фонд асобна адзначае, што няпоўная фінансавая дакументацыя з’яўляецца адной з самых распаўсюджаных прычын адхілення заявак. Таксама не прымаюцца абароненыя PDF-файлы, кароткія падатковыя выпіскі і няпоўныя дэкларацыі.

Што важна ўлічваць перад падачай
Гэтая праграма не прызначана для фінансавання выстаў, інсталяцый, адукацыйных праграм або асобных праектаў. У заяўцы не трэба апісваць новы праект, складаць бюджэт выставы або тлумачыць будучую канцэпцыю працы. Грант створаны менавіта як форма падтрымкі мастакоў, якія ўжо прысвяцілі сваё жыццё мастацтву і працягваюць працаваць нягледзячы на фінансавыя абмежаванні, адсутнасць стабільнага рынку або інстытуцыйнай падтрымкі. Таксама фонд не разглядае дадатковыя матэрыялы — каталогі, публікацыі, прэс-матэрыялы, рэцэнзіі або брашуры. Рашэнні прымаюцца незалежнай групай прафесіяналаў у галіне мастацтва, склад якой змяняецца кожны год.

Каму асабліва падыдзе гэты грант
Праграма можа быць асабліва важнай для мастакоў з працяглай практыкай, вялікім архівам работ і ўстойлівай мастацкай пазіцыяй. У адрозненне ад многіх open calls, тут увага засяроджана не на праектнай актыўнасці, а на самой мастацкай біяграфіі і шматгадовым развіцці аўтара. Гэта не самая простая праграма з пункту гледжання падрыхтоўкі архіва, фінансавых дакументаў і працяглай мастацкай біяграфіі. Аднак менавіта такія гранты рэдка залежаць ад актуальнасці праекта, трэндаў або інстытуцыйнай бачнасці. Для мастакоў з шматгадовай практыкай праграма можа стаць адной з найбольш значных форм міжнароднай падтрымкі, арыентаванай не на вытворчасць новага праекта, а на ўстойлівасць самога мастацкага жыцця.

Крайні тэрмін падачы заяўкі
У 2026 годзе заяўкі прымаліся з 15 кастрычніка 2025 года па 15 студзеня 2026 года. Наступны цыкл падачы заявак чакаецца восенню 2026 года. Усе матэрыялы падаюцца анлайн праз платформу Submittable.