Salzburg International Summer Academy — да 100 стыпендый на летнія мастацкія курсы ў Аўстрыі

Кожнае лета ў Зальцбургу праходзіць міжнародная мастацкая акадэмія, якая збірае разам мастакоў, студэнтаў мастацтваў і даследчыкаў з розных краін. На працягу некалькіх тыдняў удзельнікі працуюць у невялікіх групах з запрошанымі мастакамі і куратарамі, даследуюць новыя медыя і абмяркоўваюць уласную практыку ў інтэнсіўным міжнародным асяроддзі.
Па сваім фармаце гэта не класічная рэзідэнцыя, а хутчэй інтэнсіўная адукацыйная праграма. Аднак яна прадугледжвае часовае пагружэнне ў мастацкае асяроддзе і працу ў міжнароднай групе, таму падобныя акадэміі часта разглядаюцца як кароткатэрміновыя мастацкія рэзідэнцыі.

Адна з найстарэйшых летніх школ сучаснага мастацтва ў Еўропе
Зальцбургская міжнародная летняя акадэмія выяўленчых мастацтваў існуе з 1953 года і лічыцца адной з найстарэйшых летніх школ сучаснага мастацтва ў Еўропе. Праграма акадэміі пабудавана вакол аўтарскіх курсаў, якія штогод праводзяць мастакі, куратары і даследчыкі з розных краін. Кожны курс прысвечаны пэўнай мастацкай практыцы або тэме і доўжыцца ад адной да трох тыдняў.

Унікальныя месцы правядзення
Заняткі праходзяць у дзвюх незвычайных лакацыях горада: у гістарычнай крэпасці Hohensalzburg, якая ўзвышаецца над Зальцбургам, іў мармуровым кар’еры Untersberg, дзе ўдзельнікі могуць працаваць непасрэдна з матэрыялам і прасторай. Такое асяроддзе стварае рэдкую магчымасць аб’яднаць студыйную практыку, даследаванне матэрыялаў і абмеркаванне мастацтва ў міжнародным кантэксце.

Сферы і мастацкія практыкі
Праграма акадэміі ахоплівае шырокі спектр сфер сучаснага мастацтва. У праграме прадстаўлены курсы па жывапісе, скульптуры, фатаграфіі, інсталяцыі, перформансе, эксперыментальным кіно, творчым пісьме, куратарскай практыцы і міждысцыплінарных даследаваннях.
Кожны курс вядзе запрошаны мастак ці куратар, а групы звычайна складаюцца з 15–20 удзельнікаў, што робіць працэс навучання больш інтэнсіўным і асабістым.

Стыпендыі і фінансавая падтрымка
Акадэмія надае асаблівую ўвагу падтрымцы маладых мастакоў і студэнтаў-мастакоў. Штогод прысуджаецца каля 100 стыпендый, якія могуць пакрываць розныя выдаткі — ад платы за навучанне да пражывання і дарогі.

Праграма для краін Усходняй Еўропы
Сярод іх ёсць некалькі праграм, якія маюць асаблівае значэнне для міжнароднай аўдыторыі. Напрыклад, стыпендыі «Усходняя Еўропа» прызначаны для студэнтаў мастацтваў з краін Усходняй Еўропы, у тым ліку з Беларусі. Гэтыя стыпендыі могуць пакрыць кошт навучання, пражыванне і транспартныя выдаткі.

Стыпендыі салідарнасці
Асобная праграма Solidarity Scholarships створана для людзей, якія былі вымушаны пакінуць сваю краіну з-за пераследу або палітычных абставінаў. У гэтым выпадку акадэмія можа поўнасцю пакрываць удзел у курсе, пражыванне і паездку, пазіцыянуючы праграму як прастору міжнароднай салідарнасці і культурнага абмену.

Як падаць заяўкy
Заяўкі на ўдзел падаюцца праз анлайн-форму і адначасова лічацца рэгістрацыяй на выбраны курс. Кандыдаты павінны далучыць сваё рэзюмэ, партфоліа (каля 10 работ) і выбраць курс, у якім яны хацелі б прыняць удзел.

Чаму варта звярнуць увагу на гэту праграму
Для мастакоў і студэнтаў мастацтва ўдзел у летняй акадэміі — гэта магчымасць не толькі працаваць з міжнароднымі выкладчыкамі, але і сустрэцца з мастакамі з розных краін, абмеркаваць уласную практыку і пашырыць прафесійныя сувязі ў еўрапейскім мастацкім свеце.

Перыяд правядзення і мова навучання
Курсы праходзяць летам — звычайна з ліпеня па жнівень, а іх працягласць можа складаць адну, дзве або тры тыдні ў залежнасці ад праграмы.
Асноўная мова навучання — англійская, аднак асобныя курсы могуць часткова праводзіцца на нямецкай мове.

Апошні тэрмін падачы заявак — 7 красавіка 2026 года.
Вынікі адбору будуць абвешчаны да канца красавіка.